WIRID SATANGTUNG
Usep "Efis" Ependi Adiwijaya
Bismillah jadi awitan
Muka lengkah pikeun ngabakti
Renghap jeung Jantung tatalu
Marengan diri rumingkang
Pasti
Sesebred moal lepas tina lengkah
Bersih batin ku Sabar
Jadi Ampar laku
Ngitung sesa napas
Dina rubakna Jagat
Pikeun nyangking Asih Gusti
Bekel mulang Jaga
Mayunan Mahkamah
Mupusti Ajer tangtungan
Sarta teu lepas
Tina Tetekon hirup
Maseuhan Jisim nu Suwung
Sangkan kebek
Asihna Gusti nu Maha Ghofur
Dunya geus digurat
Jagat jadi amparan renghap
Batur laku tina Dawuh
Rahayuna
Meungkeut Jisim pribadi
Manunggal jeung anu Kagungan
Mupusti lain Migusti
Kabeh renghap jadi modal
Sumerah tanpa Lekasan
Sangkan Jisim teu Suwung
Kedal ucap jeung Patekadan
Eces dibarengan Dulur Papat
Ngahijikeun Pancer ka Diri
Manunggal dina Lengkah
Jadi Papasti
Diri teu Migusti
Tetep tandes dina Jajantung
Jadi Mataholang Kaimanan
Diri Ngampih dina
Restu tur Asih Gusti
Ridlona Allah Robbul ijati
Wirid dawamkeun laku hirup
Teu leupas tina diri Satangtung
Eling ka Gusti
Kiara payung,23022021
#MupustiTitinggalSepuh
#AmanatparaAulia
#BeberesihDiri
Terima Kasih telah mengklik blog ini
Jika berkenan scan barqode dibawah ini sebagai apresiasi bagi penulis :-)
